Zabil Mədoj: Bı Tolışə zəminədə.

Bı Tolışə zəminədə.

Band de dıyo i bə iyo,
Təyləçəşən si bə iyo,
Çand nominə pi bə iyo,
Masalədə,Nəminədə,
Bı tolışə zəminədə.

Beşi bınəv bandə dimon,
Xışmətine çoqlə semon,
Bəhə pexo,hullə limon,
Mədo,Lankon,Zəvilədə,
Bı tolışə zəminədə.

Qılım jedə çəşmə honi,
Bınəv Ulum,Şonəkoni,
İyo har fərzəndi,soni,
Sof bəvindeş dəvinədə,
Bı tolışə zəminədə.

Sə bıjənoş beşuş bə Lik,
Səvəloni bəvindeş dik,
Har əğılış otəşə zik,
Beşə bandon kəminədə,
Bı tolışə zəminədə.

Peyış sanqin,jiş hostəro,
Masaliku bə Ostoro,
Biləsıvo sərostə ro,
Ovandinə eminədə,
Bı tolışə zəminədə.

Çame pidə boy bə tolış,
Qamı pidə boy bə tolış,
Fame pidə boy bə tolış,
Təm bəvindeş,təminədə,
Bı tolışə zəminədə.