Çəmə diasporəən bə maliyyə dastəqi ehtiyociş heste

TalyshPost sayti handəkəson çəməku Tolışi mərənqon həxədə parsedən, əmənən bəvon “çə mərənqonku musahibə bəstemon, bənomon bə sayt” votedəmon. Çı Rusiya ən yolə Tolışə mərənqonədə qıləyən Tolışi Diasporəye ki, çəy rəhbərən ve hurmətinə boli İsmayıl Şabanove. De İsmayıl boli musahibə bəşmə nəzə rosnedəmon xosə handəkəson

Salam İsmayıl boli, sıməni cəmə saytədə vinde ve xose.

Azən bəşmə səlom votedəm, səlom votedəm bə şımə sayti handəkəson, bə cəmi tolışon!

İsmayıl boli, cəmə sayti handəkəsonədə veyni cıvonə əğlonin, be bəzne ki, cəvonədə kisə sımə Diasporə həxədə məlumatış ni, zəhməte Diaspora həxədə ətrofinə məlumat bıdən

Çəmə Tolışi diaspora mərənqo 2008-minə sorədə təsis bə, çə sorikuyən əmə Moskvada de tolışi ictimai-siyasi məsəlon məşğulimon. Moskvada çı tolışi xəlxi mədəniyyəti, tarixi iyən tolışi milləti həxədə məlumaton bə Rusiya ictimaiyyəti, bə Rusiya hukuməti nəzə rosnedəmonki, bıdə Rusiyədə jiyə xəlxon biznonki tolışə xəlx mardəni, hələ jiydə. Həmən çəmə əsas məqsədonədə qıləyən əveki, əmə oyo Rusiyada jimon kardedəmon, eyni zəmondə əmə Azərbaycanada jimon kardə tolışon həxi mudafiə kardəmon. təvozokorətiku diəroyən bıbu Hilal Məmmədovi, Nəvuzəli Məmmədovi mudafion misal varde bəznemon.

Umumən cıvonə əğlon çi tolışi ictimai-siyasi jimondə şirkət karde ve yolə koe, çumçiko omə cıvonon çi tolışi xəlxi taleh həl kardeədə ve yolə rolşon heste və bəbeyən. Bəçəy qornə, bəpe çəmə tolışə cıvonon bahandon, səvodin bibunki, əmə omə estafeti bəvon doy bıznəmon.

İsmayıl boli, umumən Rusiyada jiyə tolışon çand qılə mərənqoşon heste, çəvon arada de iyəndı dastqirəti çı səviyyədəy?

Umumən Rusiyada çı tolışon 5-6 qılə mərənqoşon heste, 3 qılə mərənqo Moskvadəye, 2 qılə mərənqo Ekaterinburq şəhəriədəye, Şukur bə Xıdo həmmə tolışə mərənqon de iyəndı əloğəşon heste, mehribanəti kardən, həmməən deştə koy məşğulin. Ki bə çiçi zuş vışkiedə jəqoən iştə koy kardən.

İsmayıl boli, de kon Rusiyya mərənqon, komon ki bə tolışon ayd nin, əloğon heste?

Bəle, çəmə əsas məğsədonədə qıləy əveki, de qeyri-tolışi mərənqon, dəçəvon yolon dustiəti bıkəmon, deyəvon dıli-dard bıkəmon, çəvon dılədə hurmət ğəzənc bıkəmon bıdə həmmə xəlxon tolışon bıznon.

İsmayıl boli, zınedəşon ki, tolışi zıvonədə qəzeti dərciro Azərbaycani hukumət marağin ni, bə qəzeti ıstə dasto omə bevəcəti kardedən, əmo qəzet çap bedə, sımə Diasporə mutamadi bə qəzeti dast qəte əzıni?

Şinə boli, zındənim şımə xəbə heste, ya ne, əmo bəşmə bıvotomki, Moskvada jimon kardə tolışon, şəxsən çəmə diaspora ıştə imkani ətrofədə həmişə bə tolışi qəzeti dastış qətə. əmmo bı dəyğə jəqo qıləy imkanmon nimone, Çəmə tolışi mərənqonən oyo bə maliyya koməqi eytiyayacış heste, imkan bəbəy çəmə koon xeyli bə nav əşin.

Bə cəmə sayti handəkəson çı sıxanon heste?

Az de diğğəti şımə sayti handəm, fik doydəm şımə xəyli bə nav şan, materialon ruj-bə-ruj ve bedən, Xıdo şıməku rozi bıbu, Əqəm jıqo bışuşon, şımə sayt çı tolışi mərkəzi sayt bəbe. Diasporə həmmə uzvon nomo bəşmə xəşəconi, şımə koonədə bəşmə ve yolə mıvəffəqiyyəton orzu kardəm!

Ve sağbən İsmayıl boli.

Şımənən səlomət bıbən