SƏĞ BIBƏNƏN
Səğ bıbənən.
Bə dıli cuş, həvəs ədə,
bə şeri con, nəfəs ədə,
butə vılon, səğ bıbənən!
Bə rujqari səfo biyə,
bo mahneon həvo biyə,
şo bılbılon, səğ bıbənən!
Mehmon kubız, ceyron bəşmə,
ruşin bıbu şımə çaşmə,
sardon ovon çaşi ruşnə,
ənşand dıli tamə, təşnə,
honi ğılon, səğ bıbənən!
Həvəs ocuş bo həmişə,
qin nıbu hiç i roəvijə,
bə seyr beşə, bə ov bışə,
çokon nəvə həmo, vişə,
ku, rıjolon, səğ bıbənən!
Bəhar oməy, jimon be qur,
barış rost be, zəmin be ğur,
çimənon ranq həzo i cur,
vəyşti oxşe xoş, bolı - pur,
ım məholon, səğ bıbənən!
Bı çəkeron rast beşəşon?_
pur qıldik, ser- sioqləşon,
hındılə kul vardə huşon,
əvəsori nubar, nışon,
eğə kulon, səğ bıbənən!
Bə şəv ovşım eğandə zanq,
bə ruj həşi ruşni sa ranq,
çı kəfşənon şinə ahanq,
qələvonon tutəki vanq,
şin nəğılon, səğ bıbənən!
Co aləme _ ruyo dənışt,
zərfət bıkə, yəndı sənışt,
sığonsə bə həşi bınışt,
dəvomkə ım roy, dinc mənışt,
ha əğılon, səğ bıbənən!
Mehubbəti nışon həmmə,
bəy sıxanış _ bə ni damə,
ım tam jəyo həsrət omə,
be qıno bə çaşo emə,
arsə qılon, səğ bıbənən!
Çımı xəlxım _ çımı peştım,
çımbənavım, çımbəpeştım,
qınom bəbu, əy bışıştım,
bəşmə səlom, xəy bınvıştom,
rukon, yolon, səğ bıbənən!
Jimon təmin, xəy ahure,
umur şine, orzu pure,
Xıdo bızın bə şukure,
Veşo, dınyo cəm i cure,
bo çokon de çoki pure,
çokə qılon, səğ bıbənən!
B.Veşo. 2001. ( Bandi vıl.)